„3D & AI во модата“: новата реалност на современиот дизајн

Green Land Group ја поддржа изложбата што ги поврза модата, дигиталните технологии и вештачката интелигенција

Од 27 до 29 март 2026 година, во рамките на 32. издание на Fashion Weekend Skopje, во Diamond Area Space се одржа изложбата и јавната дискусија „3D & AI во модата“.

Изложбата, финансирана од Европската Унија и поддржана од Green Land Group како дел од проектот DigiFashTech, претстави успешни регионални проекти и примери што ја истражуваат пресечната точка меѓу модата, 3D-технологиите и вештачката интелигенција.

Преку делата на новата генерација дигитални уметници и дизајнери, публиката имаше можност да види како модата се движи од материјалното кон дигиталното и од готовата форма кон постојан процес на истражување и трансформација. Изложбата покажа дека 3D-дизајнот и вештачката интелигенција повеќе не се само експериментални алатки, туку стануваат дел од современата креативна практика.

Презентациите се одвиваа непосредно, во рамките на самите инсталации. Авторите директно разговараа со посетителите, ги објаснуваа своите процеси и отвораа прашања за иднината на модата, визуелната култура и улогата на новите технологии.

Меѓу претставените автори, Никола Ефтимов ја третираше модата како простор на трансформација, преведувајќи ја традицијата во современ дигитален контекст преку препознатлив визуелен јазик.

Емилија Славкова, со проектот „From Clay to Code“, ја следеше женската фигура како континуитет низ времето – од физичка форма до дигитална структура што не го губи својот идентитет, туку го преобразува и надградува.

Изложбата обедини регионални автори, дизајнери и студентски проекти, создавајќи простор за нови идеи, соработка и отворен разговор за промените што технологијата ги носи во креативните индустрии.

Со поддршката на „3D & AI во модата“, Green Land Group ја продолжува својата заложба за иницијативи што ги поврзуваат младите, образованието, креативноста и иновациите. Веруваме дека одговорната иднина се создава преку знаење, истражување и поддршка на луѓето што имаат храброст да ги поместуваат границите.

Green Land Group – поддршка за идеи што ја обликуваат иднината.